Ħamburg

Bl-atmosfera rilassanti tagħha, l-abitanti soċjevoli u l-orizzont ħieles mill-iskajskrejpers, Ħamburg tilqa' lil dawk li jżuruha b'idejha miftuħin. Din il-belt forsi mhijiex magħrufa daqs Berlin, iżda toffri lit-turisti opportunità eċċellenti sabiex jiskopru parti sabiħa tal-Ġermanja f'ambjent kalm.

Kien f'Ħamburg li l-Beatles tgħallmu jdoqqu, jistudjaw sett wara sett fil-klabb Kaiserkeller. Iżda l-kredenzjali mużikali tal-belt għadhom ħajjin sal-lum. Ħamburg hija rikonoxxuta b'mod ġenerali bħala l-belt tal-mużika fil-Ġermanja, b'numru kbir ta' klabbs b'mużika live, kif ukoll bi skeda mimlija ta' kunċerti.

Għal dawk li jħobbu l-mużika klassika, din il-belt, li welldet ġenji kbar bħal Mendelssohn u Brahms, għandha tliet orkestri filarmoniċi: il-Philharmoniker Hamburg, in-North German Radio Symphony Orchestra u l-Hamburger Symphoniker. Hemm ukoll it-Teatru Statali tal-Opra ta' Ħamburg u xena eċċitanti għall-musicals.

Dawk li jħobbu l-ikel raffinat mhux ser joħorġu diżappuntati. L-influwenzi kulturali kbar ta' Ħamburg wasslu għal firxa wiesgħa ta' ristoranti etniċi tal-aqwa klassi, iżda r-ristoranti lokali tal-belt sejrin tajjeb ukoll. L-ikel tipiku ta' Ħamburg, li jinkludi laħam frisk u mqadded, ħut u sopop, qiegħed jesperjenza qawmien mill-ġdid, u l-koki innovattivi tal-belt qegħdin jieħdu dawn il-platti f'livelli għolja ġodda għal dawk li huma aktar avventurużi fl-ikel.