Sofia

Sofia, belt li tinsab tabilħaqq f'salib it-toroq, fejn il-Lvant jiltaqa' mal-Punent, fejn l-antik u l-ġdid jidħlu f'xulxin u fejn il-fdalijiet tal-komuniżmu antik, bil-faxxinu romantiku tiegħu, jiltaqa' mat-twerdin qawwi ta' belt kosmopolitana moderna.

Madankollu, hija l-ikonografija u l-arkitettura reliġjuża tal-belt li tispikka mill-ewwel. Sofia tospita l-Katidral ta' Alexander Nevski, eżempju mill-aqwa tal-arkitettura Neo-Biżantina. Il-knisja għandha koppla b'għoli ta' 45 metru, ibbanjata bid-deheb, li tintgħaraf b'mod ċar minn mili 'l bogħod.

Ġewwa, issib dekorazzjoni abbundanti b'irħam Taljan, alabastru, oniċi u deheb. Il-knisja nbniet b'dedika għall-mijiet ta' eluf ta' suldati Russi li mietu fil-Gwerra Russo-Torka. Il-knisja għandha wkoll mużew b'waħda mill-akbar kollezzjonijiet ta' ikoni reliġjużi minn madwar il-pajjiż kollu.

Sofia għandha ħafna knejjes oħrajn li jimmeritaw żjara, fosthom il-Knisja Boyana – knisja Ortodossa Bulgara medjevali b'affreski kbar li jmorru lura għas-seklu 13.

Kif jixraq lil belt Ewropea ewlenija, Sofia għandha bosta żoni u parks ekoloġiċi, fosthom il-Borisova Gradina Park. Dan il-park fih żewġ stadji, kampijiet tat-tenis, mogħdijiet għar-roti u żoni maħsuba għad-divertiment.

Wieħed mill-aktar aspetti interessanti huwa l-monument enormi tat-Tomba tal-Fratellanza fin-naħa tal-Lvant tal-park. Bħal bosta monumenti Sovjetiċi, dan ċertament li mhuwiex nieqes mid-drama, billi jinkludi obelisk b'għoli ta' 42 metru, kif ukoll statwi drammatiċi ta' suldati u ħaddiema jmexxu 'l quddiem il-kawża tagħhom b'ċertu sens ta' dmir.

Sofia hija belt tal-futbol, b'diversi timijiet attivi, fosthom CSKA u Levski, li jgawdu segwitu b'saħħtu. Jekk tkun fil-belt, ma għandekx titlef li tara logħba futbol, kemm jekk fil-grawnd jew inkella f'bar jew kafetterija mimlija bin-nies.

Madankollu, żomm f'moħħok din id-drawwa stramba – il-Bulgari ġeneralment iċaqilqu rashom mix-xellug għal-lemin biex ifissru iva, u 'l fuq u 'l isfel biex ifissru le, għalhekk, jekk ma tridx tidħol f'diskussjonijiet jaħarqu dwar il-futbol, ftakar li trid taqleb il-movimenti ta' rasek bil-maqlub!